Senior Home Heating Subsidy húlye Ɂałneth Húlı̨ dé, Bet’á Kų́e Yı́s Hunédhël Xa Tsamba T’á Dënets’édı Ɂats’edı
T’a Ghą Dëne Xél Hadı
Senior Home Heating Subsidy húlye sı́ t’ą ɂałneth tsamba hanunı dáłtsıle sı́ bekų́é yı́s hunédhël xa bets’édı xadúwı́lé. Nekų́é yı́s hunédhël xa tsamba núrútágh benolnı́. T’ą ɂałneth bets’édı lası́, t’anı́łt’e t’á bets’édı́ sı́, ɂeyı ɂą́ą́s t’ası́ rıłtı dé, t’anıłt’é deɂą́ą́s rıłtı sı́ denı ɂeyı t’a náyełnı xaɂą
Dëne Ts’édı xa Tsamba Theɂą
T’ą ɂałneth bets’édı xadúwı́le sı́ T’anchay Nátł’ır Za ts’ı̨ Benıłı̨tthël Za ts’ë́n sa hant’u tsamba t’á bets’édı-u, t’anı́łt’e t’á bets’édı sı́ t’a háyǫrı̨́la nádhër ɂeyı ghár ɂat’e. Ɂı̨łágh za k’e t’anı́lt’e tsamba t’á dënets’édı sı́, ɂeyı k’aɂǫ k’udhër dé, t’a háádhër sı́ yunedhe za k’e bet’át’ı̨ xadúwı́le. T’a náts’edhër gháré t’anı́łt’e tsamba t’á dëne ts’édı-u, t’anı́łt’e k’áɂǫ tsamba hałe xaɂą-u, tth’ı t’anı́łt’e tsamba t’á dënets’édı sı́ yuyághe bek’eréhtł’ı́s:
| Zone 1 | Zone 2 | Zone 3 | |
|---|---|---|---|
| Hayǫrı̨́la |
Behchokǫ̀ Dettah Enterprise Fort Providence Fort Simpson Fort Smith Hay River K’atł’odeeche Kakisa Ndılǫ Yellowknife |
Fort Liard Fort Resolution Gametì Inuvik Jean Marie River Nahanni Butte Whatì Wrigley |
Aklavik Colville Lake Délı̨nę Fort Good Hope Fort McPherson Łutselk’e Norman Wells* Paulatuk Sachs Harbour Saamba K'e Tsiigehtchic Tuktoyaktuk Tulita Ulukhaktok Wekweètì |
| T’anı́łt’e Tsamba Hałe Xaɂa | $56,000 hánıłt’e ts’ë́n | $64,000 hánıłt’e ts’ë́n | $73,000 hánıłt’e ts’ë́n |
| 2024-2025 nultagh k’e ɂı̨łágh za hant’u t’anı́łt’e tsamba t’á dënets’édı | $460 | $560 | $750 |
| 2024-2025 núltagh k’e harelyı̨́ t’á t’anı́łt’e tsamba t’á dënets’édı́ | $3,680 | $4,480 | $6,000 |
T’o nade dëneba háɂą
2024 – 2025 núltagh ɂeyı ghay (2024 T’anchay Natł’ır Za núltagh ts’ı̨ – 2025 Benıłı̨thël Za núltagh ts’ë́n) xa kų́e yı́s bet’á hunédhël xa tsamba t’á dëne ts’édı xa ɂerehtł’ı́s selna xadúwı́le 2024 k’e Benıłı̨tthël Za ɂı̨łágh núltagh ts’ı̨ 2025 k’e Benıłı̨tthël Zá tonas núltagh ts’ë́n ɂerehtł’ı́s selne xadúwı́le.
T’at’ú dëne xél hultágh xadúwı́le
Ɂedërı dëne ts’édı sı́ T’ą Ją Ɂedza Në́n Nárádé sı́ denı beba ɂat’e:
- T’ą Ją Ɂedza Në́n narade sı́
- T’a ɂełk’ét’onas beghay ts’ı̨ yudágh sı́
- Ɂeyı kųe sı́ denı bets’ı̨ kųe ɂat’e ɂeyër nádhër, hat’ele dé sa hant’u kų́é nałnı t’a ɂeyër nádhër-u, kų́é yı́s hunédhël denı tth’ı thën náı́yełnı
- Ɂeyër dëne nádé sı́ harelyų́ t’á t’anı́łt’e tsamba dáı́heghą sı́ súgha k’énéłt’e ɂą́ą́s xaɂąıle ɂeyı xa net’ı̨
- Beba nádı hat’éle
- Xay hant’u dënets’édı xa ɂerehtł’ı́s sélye ɂat’e
T’at’ú ɂerehtł’ı́s selye
Senıor Home Heatıng Subsıdy húlye ɂeyı t’á nets’édı xa rıkë́r rılɂı̨ dé ɂeyı Applıcatıon húlye ɂerehtł’ı́s senele xaɂą. Ɂeyër ECE Servıce Centre húlye heɂą sı́ ɂedërı ghą bexél hadı xaɂą t’anı́łt’e dëneghay t’ası́ ɂerehtł’ıs k’e rehtł’ıs-u, ɂeyër harelyų́ dëne nádé sı́ t’anı́łt’e tsamba dághą-u, ɂeyı kų́é dënets’ı̨ ɂat’e t’ó sa hant’u nánı́ tó ɂeyı ghą bexel hadı.