Dëneba Nádı

T’a Ghą Dëne Xél Hadı

Ɂedërı dënets’édı háɂą sı́ Jądı́zı̨́ Ɂedzagh Në́n (NWT) k’e dëne náráde sı́ t’ası́ dı̨ náltı́ ch’á bets’édı ɂat’e. Ɂeyı hát’u dënets’édı sı́ bet’á t’ą bets’édı sı́ yuneth haɂa tsamba ghą nudhër dé nezų́ ts’ë́n hathel xalɂı̨ ɂat’e yet’á háyǫrı̨́la náts’ede dënı tsamba bets’ı̨ t’á dënexél ɂat’ı̨ xadúwı́le-u, Jądı́zı̨́ Ɂedzagh Në́n k’e t’asát’u t’ası́ bet’óredhır xadúwı́lé dé ɂeyı t’á denı tth’ı dënexél ɂat’ı̨ xadúwı́le.

Dëne Ts’édı xa Tsamba Theɂą

Ɂı̨łágh kųe ts’ı̨ t’anı́łt’a dëne ɂeła nádé-u, ɂeyı ɂı̨łágh kų́é dëne nádé t’anı́łt’e tsamba tágą-u, tth’ı t’a háyǫrı̨́la náı́hedı ɂeyı harelyų́ hultagh ɂat’e t’anı́łt’e tsamba t’á bets’édı xa net’ı̨ ghą núdhër dé. Ɂedërı hat’u dënets’édı sı́, dek’énéłt’e dëneba kųe k’e nánı-u, utılıtıes húlye tth’ı xa dënets’édı xadúwı́le

T’o nade dëneba háɂą

Income Assıstance húlye sı́ sa hant’u dënets’édı háɂą ɂat’e-u, t’ą bets’édı sı́ t’ó ɂerehtł’ı́s sele haɂą sı́ háne-u, t’a ɂerehtł’ı́s bets’ekér sı́ dënedláyı́le xaɂą. Dëne ts’édı rets’eker xa ɂerehtł’ı́s selye sı́ sa lą tthe dëne dlalye xaɂą.

T’at’ú dëne xél hultágh xadúwı́le

Ɂedërı dënets’édı háɂą sı́ t’ą beba ɂalɂı̨:

  • T’ą t’ası́ t’á bek’uréłɂą dálı̨ łǫ́tądhel beghąy ts’ı̨ sǫlóna ts’ë́n łǫ́tą́ beghay Jądı́zı̨́ Ɂedzagh Në́n k’e nádé sı́, hat’ele dé
  • T’anı́łt’e tsamba deltsı dek’énéłt’ele t’á náltı

T’at’ú ɂerehtł’ı́s selye

Neba nádı xa rıkér rı́lɂı̨ dé, ɂeyër ECE Servıce Centre húlye heɂą sı́ nánegha-u ɂedërı Income Assıstance Dëneba Nádı́ háɂąɂeyı xa ɂerehtł’ı́s senele-u, t’at’ı ɂerehtł’ıs rı́lɂı̨ néts’edı sı́ ɂeyı bedlánele.

Ɂeyër t’a háyǫrı̨́la nánedhër Clıent Servıces Offıcer húlye ECE Servıce Centre húlye ɂeghálana sı́ nexél ɂerehtł’ı́s sele xadúwı́le.

Ɂełéłt’e lát’e hanı ją hulı̨