Ɂałneth chu T’ą T’ası́ T’á Bek’uréłɂą Beba Nádı́
T’a Ghą Dëne Xél Hadı
Ɂedërı tsamba t’á dënets’édı háɂą sı́ Jądı́zı̨́ Ɂedzagh Në́n (NWT) ɂałneth chu t’ą t’ası́ t’á bek’uréłɂą ɂeyı behets’édı xadúwı́le ɂeyı t’á. Ɂeyı hát’u dënets’édı sı́ bet’á t’ą bets’édı sı́ yuneth haɂa tsamba ghą nudhër dé nezų́ ts’ë́n hathel xalɂı̨ ɂat’e yet’á háyǫrı̨́la náts’ede dënı tsamba bets’ı̨ t’á dënexél ɂat’ı̨ xadúwı́le-u, Jądı́zı̨́ Ɂedzagh Në́n k’e t’asát’u t’ası́ bet’óredhır xadúwı́lé dé ɂeyı t’á denı tth’ı dënexél ɂat’ı̨ xadúwı́le.
Dëne Ts’édı xa Tsamba Theɂą
T’anı́łt’e tsamba t’á dënets’édı ghą núdhër dé ɂeyı ɂı̨łágh hárelɂa t’anı́łt’e henılt’e-u ɂeyër náı́hedé-u, ɂeyı ɂıłágh kų́é náts’edé t’anı́łt’e tsamba hałé-u, tth’ı t’a háyǫrı̨́la náıhedé sı́ ɂeyı harelyų́ net’ı̨ ɂat’e. Ɂedërı tsamba t’á dënets’édı sı́ kų́é t’anı́łt’e nánı chu utılıtıes húlye ɂeyı tth’ı t’anı́łt’e nánı xaɂą sı́ hánı́łt’e dëne nánı ɂat’e.
T’o nade dëneba háɂą
Ɂałneth chu T’ą T’ası́ T’á Bek’uréłɂą Beba Nádı́ hát’u dënets’édı sı́ xay hant’u dënets’édı háɂą ɂat’e-u, t’ą bets’édı xa relɂı̨ sı́ ɂı̨łágh ghay hant’u bets’édı xa ɂerehtł’ıs séle xaɂą, harelyų́ t’at’ı hanı rets’ek’ér sı́, ɂeyı tth’ı dënetł’alye xaɂą t’at’e lı̨́ xa net’ı̨ t’á. Tsamba Nálye Zá ɂıłágh núltagh ɂeyër ts’ı̨ dënets’édı xa rets’ekér ɂerehtł’ı́s selne xadúwı́le t'olası́ ɂeyı tł’ą́gh. T’ą bets’édı sı́, utılıty bılls húlye ɂeyı hát’ı ɂı̨łágh za hant’u ɂeyı dëneba nánı xa ɂeyı ɂerehtł’ı́s nuwets’ekér dé háne xadúwı́le.
T’at’ú dëne xél hultágh xadúwı́le
Ɂedërı dënets’édı háɂą sı́ t’ą beba ɂalɂı̨:
- T’ą t’ası́ t’á bek’uréłɂą dálı̨ łǫ́tądhel beghąy ts’ı̨ sǫlóna ts’ë́n łǫ́tą́ beghay Jądı́zı̨́ Ɂedzagh Në́n k’e nádé sı́, hat’ele dé
- T’ą ɂałneth ɂełk’ét’onas beghay ts’ı̨ yudághé (60) Jądı́zı̨́ Ɂedzagh Në́n k’e nádé sı́, tth’ı
- T’anı́łt’e tsamba deltsı dek’énéłt’ele t’á náltı
T’at’ú ɂerehtł’ı́s selye
Nets’édı xa rıkér rı́lɂı̨ dé, ɂeyër ECE Servıce Centre húlye heɂą sı́ nánegha-u ɂedërı Ɂałneth chu T’ą T’ası́ T’á Bek’uréłɂą Beba Nádı́ háɂą Income Assistance for Seniors and Persons with Disabilities húlye ɂeyı xa ɂerehtł’ı́s senele-u, t’at’ı ɂerehtł’ıs rı́lɂı̨ néts’edı sı́ ɂeyı bedlánele.
Ɂeyër t’a háyǫrı̨́la nánedhër Clıent Servıces Offıcer húlye ECE Servıce Centre húlye ɂeyër ɂeghálana sı́ nexél ɂerehtł’ı́s sele xadúwı́le.
Ɂełéłt’e lát’e hanı ją hulı̨
- Dëneba Nadı – Beghár Ɂeghálada Ɂerehtł’ı́s (T’ąlası Yenurenı́ Xa Ɂeretł’ıs)
- T’aghár T’ası́ Beghálada
- Socıal Assıstance Act húlye Dëneba Nádı Xa Yatı Néth Theɂą
- Income Assıstance Regulatıons húlye Dëneba Nádı́ Xa Yatı Néth Theɂą Ɂeyı Beghár Beghálada ɂat’e
- Income Assıstance Polıcy Manual húlye sı́ Dëneba Nádı́ t’at’u beghálada xa ɂerehtł’ıs ɂat’e.