Yunı́zı̨ ts’ı̨ Hanı Ɂerehtł’ı́s
Jądı́zı̨́ Ɂedzagh Në́n ts’ı̨ Nı́é Ts’ë́n K’aldhër ts’ı̨ Department of Educatıon, Culture and Employment (ECE) húlye ɂeyër sı́, Jądı́zı̨́ Ɂedzagh Në́n ɂeyër yunı́zı̨ ts’ı̨ Ɂerehtł’ı́s Kų́é Nats’ı́dı́l ts’ı̨ Ɂerehtł’ı́s hayéłya tó t’a ts’é lı̨ yek’úrélyą tǫ ɂat’e. Ɂedërı hat’ı ɂerehtł’ıs sı́ t’ą ɂeyër ɂerehtł’ı́s kų́é naıdıl bets’ı̨ ɂerehtł’ıs tó, ɂı̨łágh za hant’u ɂeyı za k’e t’anı́łt’e sekuı ɂerehtł’ı́s kų́é náthedél hı̨lé sı́-u, tth’ı attendance húlye t’anı́łt’e sekuı ɂerehtł’ı́s kų́é náı́dıl ɂeyı beghą ɂerehtł’ı́s-u tth’ı tagh za hant’u ɂerehtł’ı́s selye xaɂą, ɂeyı hát’ı tth’ı.
Yunı́zı̨ ts’ı̨ Ɂerehtł’ı́s Kų́é Nats’ı́dı́l ts’ı̨ Ɂerehtł’ı́s rıkér tó yuɂáné dëneba rıkér tó dé, ɂedërı Request for Standard Student Records form húlye ɂerehtł’ı́s senele. Yuɂane dëneba ɂeyı ɂerehtł’ı́s rıkér dé, t’ą beba ɂerehtł’ı́s rıkér sı́, ɂeyı seghár ɂat’ı̨ hénı-u ɂerehtł’ı́s netł’ałchuth haɂą (t’at’ı ɂats’edı sı́: t’ą beba ɂanet’ı̨ denı bezı́ to, dëne senáłtı dëne beghár dënexa k’ats’elthër ts’elı̨ ts’ı̨ ɂerehtł’ı́s to, power of attorney húlye ɂeyı hát’ı to).
Ɂeyı ɂerehtł’ı́s té nezų́ senele-u, nezı́ bek’ë́rıhtł’ıs-u, Student records húlye ɂeyër ts’ë́n beba nı́le, ɂerehtł’ı́s dzérelyı t’á to, beyé yatı yé fax húlye ɂeyı to, computer yé tth’ı dënets’ë́n ɂerehtł’ı́s nı́lchuth xadúwı́le. Té nezų́ ɂerehtł’ı́s senele xa rúłdzágh.
Ɂeyı t’a ɂerehtł’ı́s kų́é beghą rıłker sı́, t’olye bek’úrılyąıle tó, t’o ɂeyër ɂerehtł’ı́s kų́é nats’ı́dıl hı̨lé to, hat’e dé, t’o yıdhën sı-u, t’a háyǫrı̨́la ɂeyı ɂerehtł’ı́s kų́é theɂą sı́ tth’ı hálını. Hát’u ɂalyá dé t’ą ECE húlye ba ɂeghádálana sı́, t’at’ú bexél hadı ghár ɂerehtł’ı́s kánehetagh ɂat’e t’á nezų́ bexél hadı dé, ɂaghą́ ɂerehtł’ı́s húlɂa xadúwı́le tosą. Beghą t’ası́ ghą rıłker rı́lɂı̨ dé, Student Records húlye ts’ë́n yanełtı ją ts’ë́n (867) 767-9353 ext. 71265.
Indıan Boardıng Homes Class Actıon Húlye
Ɂeyı Indıan Boardıng Homes Program húlye hı̨lé sı́ t’atthe dëne dédlıne ts’ı̨ɂáné sekuı chu ɂeténá ts’ı̨ɂáne sekuı chu ɂerehtł’ı́s kų́é naıdı́l xa bekų́é ch’ası̨́ helyé-u yuɂáné háyǫrı̨́la ɂedų́ dënegá náı́hedé ɂalyá hı̨lé.
1951 k’e T'ánchay Nátłır za ɂı̨łághe núltágh ts’ı̨ 1992 k’e Ɂeghés za tonas núltágh ts’ë́n ɂedërı hát’ı ɂerehtł’ıs náı́dáxa yuɂáné dëne begá nánëdhër hı̨lé dé: hat’ele dé 1992 k’e Ɂeghés Za tonas núltagh tł’ągh Yunághe Ts’ı̨ Nı́é Ts’ë́n K’aldhër (Dëne Dédlıne Ts’ı̨ɂáne ts’ı̨ k’ats’elde) betł’as yuɂáné dënegá nánedhër xa nı́lya hı̨lé dé, ɂaghą ɂeyı xa Yunághe Ts’ı̨ Nı́é Ts’ë́n K’aldhër nets’ë́n náłnı xadúwı́le tosą.
Yunaghe ts’ı̨ Nı́é Ts’ë́n K’aldhër nets’ë́n nałnı xa rıkér rılɂı̨ xa de, t’atthe yunı́zı̨́ ɂerehtł’ı́s kų́é naıdáy hı̨lé sı́ ts’ı̨ Department of Educatıon, Culture and Employment húlye ɂerehtł’ıs burıkér xadúwı́le ją́.
Yunaghe ts’ı̨ Nı́é Ts’ë́n K’aldhër dënets’ë́n nałnı xa buts’ekér xa dé, 2027 k’e Sanedúwé Za nonas nák’e núltagh ɂeyër ts’ë́n dëneba háɂą ɂat’e.
Nën tó yuɂáné ɂı̨łágh dëne dënexar kų́é náı́dhër t’á beba hunı́la dé, dëne ts’édı xa surıdhën ɂat’e.