Dų Aurora College húlye theɂą sı́ polytechnic university húlye ɂeyi hát’ú ts’ë́n nút’agh xa sı́ ɂeyi t’at’u bet’órédhir xa

Jadı́zı̨́ Ɂedzagh Në́n k’e chu háyǫrı̨́la dëne nárádé sı́ yet’órełdhir xa ɂeyi dų Aurora College húlye theɂą sı́ polytechnic university húlye ɂeyi hát’i nełé xa núút’agh. Ɂeyi hályá dé ɂerehtł’ı́s kų́é nedhé nut’e dé ɂerehtł’ı́s dëne ghálye sı́ ɂeyi xa deɂánı́łt’e t’ası́ ɂełk’éch’a ghą dëne honeltën xáɂą xa-u tth’i jądı́zı̨́ në́n bet’óredhir xa t’ası́ bek’aunetagh háɂą xa.

Ɂeyi “polytechnic” university húlye sı́ t’ası́ hałé t’á dëne honeltën ɂeyi hát’u dëne honeltën-u, bet’óredhir-u beghár ɂeghálada xa t’ası́ k’aunetagh beghálada háɂą ɂat’e – t’a bek’aunetagh sı́ dëne beba t’a t’á bba hunı́la ɂeyi t’a bek’áunetagh ɂat’e. Ɂeyi hát’i polytechnic university húlye sı́, t’ą la dëneghále-u tth’i háyǫrı̨́la dëne nárádé sı́ yet’á la bets’į niłé lı́ xa honeltën ɂeyi hát’u xa ts’ë́n beghálada ɂat’e.

Dëne ɂeyi hát’i polytechnic university húlye ɂeyër honeltën dé ɂerehtł’ı́s kų́é yı́s honeltën-u, ɂeyër thedaile húlı́ ɂałų honeltën xadúwı́le-u, nánis tth’i honeltën xadúwı́le-u tth’i la hut’ún húlı́, ɂeyër tth’i honeltën xadúwı́le. Jadı́zı̨́ ɂedzagh në́n k’e dëne nárádé sı́ ɂahdëne hát’u dáreldën ɂat’e t’á ɂeyi beghár hurı́ldën xa. Nades núdhër dé, jadı́zı̨́ ɂedzagh në́n k’e dëne nárádé sı́ yuɂáné ts’ë́n hedélı̨́le-u ją t’a honeltën xadúwı́le háɂą xa-u, ɂałneth dálį-u ɂerehtł’ı́s kų́é dánait’e xa honeltën xadúwı́le-u, tth’i ɂerehtł’ı́s kų́é néth nats’ı́dı́l xadúwı́le, bekų́é ch’as hedéle húlı́.

Ɂeyi hát’u núútagh xa sı́ not’e dé deɂą́ą́s bet’óreɂa-u, t’ąlási honeltën xa ɂeyër naidı́l-u, Jadı́zı̨́ Ɂedzagh Në́n ts’į deɂánı́łt’e dëne honeltën xa ɂeyër naidı́l xa, tth’i yuɂáné ts’į dëne ɂeyër honeltën náı́dil xa. Hát’u núútagh sı́ bet’á Jadı́zı̨́ Në́n dëne nárádé sı́ yet’á tsamba dágą xa-u tagh háyǫrı̨́la ɂeyi haát’i ɂerehtł’ı́s kų́é núlye ɂeyër tth’i bet’óredhir xa.

Ɂeyi ɂerehtł’ı́s kų́é néth nútágh sı́ ɂeyër t’a dëne honeltën xa sı́ súghániłtha beghálada xaɂą-u, tth’i jadı́zı̨́ ɂedzagh në́n k’e dëne nárádé sı́ t’a k’édórelyą t’at’ú ɂeyi bet’áát’i xa ɂeyi harelyų́ net’į xa. Jadı́zı̨́ ɂedzagh në́n k’e dëne nárádé sı́ t’ası́ góth honeltën xadúwı́le-u, tth’i t’ası́ deɂą́ą́s dóreldį -u bet’á t’at’ú dëne hóneltën-u t’at’ú t’ası́ k’aunetagh, ɂeyi sı́, ɂedëri jat’u ts’ë́n dëne honeltën xa:

  • Dëne lá t’á t’ası́ beghálada-u tth’i satsán t’á t’ası́ beghálada – nuwets’į tįlu dólį si-u tth’i nuwets’į kų́é dólį sı́ t’é nezų́ dáthela xa t’a bek’óreją t’á beghálada xa ɂeyi ghą dëne honeltën xa
  • Nı́ ts’į t’ası́ chu nı́ t’at’ú surelthën – nı́ t’at’ú bet’áát’į-u, t’at’ú sureldhën-u, t’at’ú ts’ę́dhir ch’á xa badi ɂeyi hat’u bet’á ɂaté dáı́da-u náráı́tsër.
  • Dëne suwenay-u, dëne honeltën-u tth’i háyǫrı̨́la t’at’ú dëneba ɂeghálada surelthën - háyǫrı̨́la chu dëne ɂeyër nárádé sı́ ɂaté dána-u nárátsër háɂą
  • Bet’á Tsamba hałé-u tth’i k’ats’eldé – Jadı́zı̨́ Ɂedzagh Në́n k’e dëne nárádé t’ası́ ghą k’arádé dálį xa honeltën-u, jadı́zı̨́ në́n k’e bet’óréɂa xa ɂeyi ts’ë́n ɂegháláda xa dëne ts’édi

Dų Aurora College húlye theɂą ɂeyër dëne ɂeghádálana sı́ t’at’ú t’ası́ góth ghą dëne hodáneltën xa suhúde ghą nádé ɂat’e. Ɂeyi ɂedų́ núút’agh xa sı́ dį gháy húk’e ts’ë́n beghálada xa. Du t’ą sekui high school húlye naidil ɂaja sı́ ɂeyi polytechnic húlye nút’ágh sı́ ɂeyër honeltën xa náı́dil xadúwı́le. 

Aurora College dų t’at’ú háɂą sı́ beghálaida t’á ɂedų́ ɂane búret’į xa. Ɂeła ɂedų́ ts’ë́n beghálaida xaɂą-u, dëne honeltën ɂerehtł’ı́s kų́é naidı́l sı́ bets’édi xa deɂánı́łt’e dëne ła beghálye-u tth’i t’a kų́é yı́s ɂeghádálaida sı́ senailye xa. Ɂedëri hát’u ɂeyi polytechnic university húlye góth nút’ágh sı́ nuwe hołni-u nuwexél nidé.