Aurora College nı̨htł’èkǫ̀deè elı̨ ade ha wet’à dǫ Edzanèk’e łǫgǫǫ̀ ts’adı ha hohłè ha, nekǫ̀ta ts’ǫ sı̀ı. Dǫne łǫgǫǫ̀ hoghàgeètǫ gha nı̨htł’èdeè taı kaɂa gı̨ǫzhe ade ha eyıts’ǫ edzanèk’e ası̀ı wedanàgeta la sı̀ı łǫgǫǫ̀ weghàlageda ade ha.  

Dı̀ı “nı̨htł’èkǫ̀deè” ası̀ı hats’ehɂı̨ t’à hoghàgotǫ nı̨htł’èkǫ̀deè elı̨ ha eyıts’ǫ ası̀ı wedanàts’eta sı̀ı k’è – goneè ayı̀ı gogha wet’aɂà hanı t’a ası̀ı wedanàgeta ha. Dı̀ı hanı nı̨htł’èkǫ̀deè wet’à kǫ̀ta amı̀ı dǫ gha eghàlagı̀de sı̀ı xè gogede xè la xęę̀t’e gha kǫ̀ta xè eghàlagı̀de ha wet’à la gha ts’atà hoghànegehtǫ ha.

Dı̀ı hanı nı̨htł’èkǫ̀deè, dǫne kǫ̀a goyı̀ı hoghàgetǫ, ahsı̨̀ kǫ̀ta ts’ǫ sı̀ı, dechı̨nta sı̀ı eyıts’ǫ la k’e sı̀ı hoghàgetǫ ha. Dǫne łǫ dı̀ı hanı̀ gohdǫ hoghàgetǫ eyıts’ǫ ı̨neè edàanı̀ goxè xòı̨wo ı̨lè weghà hoghàdets’etǫ ha. Nǫ̀de ts’ǫ nı̨dè, dı̀ı nı̨htł’èkǫ̀deè dǫne edzanèk’e ts’ǫ nı̨htł’è netłǫ hoghàgetǫ ha dı̀le eyıts’ǫ nı̨htł’èdeè taı kaɂa ts’ǫ̀ gha nı̨htł’èkǫ̀ aget’ı̨ ha dı̀le eyıts’ǫ ı̨daa nèk’e ts’ǫ̀ aget’ı̨-le hò nı̨htł’èdeè gıǫ̀chı ha dı̀le, eyıts’ǫ dekǫ̀ta ts’ǫ agede-le hò nı̨htł’èdeè gıǫchı ha dı̀le.

Dı̀ı nı̨htł’èkǫ̀deè hohłè ekı̀yeh, deèɂǫ̀ nàtso ade ha, dǫne łǫgǫǫ̀ gıt’at’ı̨ ade ha eyıts’ǫ cheku edzanèk’e ts’ǫ dı̀ı nı̨htł’èkǫ̀deè aget’ı̨ hade ha eyı̀ı zǫ-le hò, dǫne eyı̀-le nèk’e ts’ǫ sı̀ı jǫ nı̨h̨ł’èkǫ̀ aget’ı̨ ade ha tahkò. Wet’à sı̀ı edzanèk’e ts’ǫ̀ sǫǫ̀mba at’ı̨ ade ha, eyıxè sı̀ı kǫ̀ta taı dı̀ı nı̨htł’èkǫ̀deè whela ha sı̀ı, wet’ahogehɂa ade ha.

Dı̀ı nı̨htł’èkǫ̀deè edàanı̀ dǫne hoghàgehtǫ ha edexè segogele ha sı̀ı, edląą̀wa ts’ǫ̀ weghàlada tł’axǫǫ̀ eyıts’ǫ edàanı̀ dǫne edzanèk’e hoghàdegı̀tǫ gı̨wǫ sı̀ı weghà adle ha. Dǫne edzanèk’e edàanı̀ hoghàgıı̀tǫ gı̨wǫ sı̀ı la wegò sı̀ı k’è adle ha eyıts’ǫ la mǫhdaà ełek’è whela k’è sı̀ı dǫne hoghàgeètǫ ade ha eyıts’ǫ ası̀ı k’ezhǫdeè k’è sı̀ı wedanàta xè dǫne hoghagogehtǫ ha:

• Kǫ̀ta ası̀ı segı̨hwhǫ la eyıts’ǫ satsǫ̀ wet’à ets’eètł’è nàowo – gotı̨lı eyıts’ǫ gokǫ̀ hotı nezı̨ k’egedı, dı̀ı hanı nàowo t’à, nàedık’èzhò nàowo eyıts’ǫ dǫne nàowo t’à hoghàgetǫ ha
• Ndè ts’ǫ ası̀ı eyıts’ǫ ndè wexòedı nàowo – ndè wet’à gokw’ıta nàtso xè gonı̀ı nàtso wet’àts’et’ı̨, wexòets’ıhdı eyıts’ǫ esawǫ̀dech’à wexòedı
• Nàedık’èzhǫ nàowo, nı̨htł’èkǫ̀ eyıts’ǫ kǫ̀ta nàowo t’à gots’àdı – wet’à gòet’ı̨ı̨̀ eyıts’ǫ gokǫ̀ta hotı wet’à nàts’etso xè hotı ets’enda
• Whacho edegha eghàlats’eda eyıts’ǫ k’ats’ede nàowo – dǫne edzanèk’e nàde edets’ǫ̀ k’agede ha gıts’àdı wet’à deèɂǫ̀ goneè nàtso ade ha
   

Dı̀ı gha, amı̀ı Aurora College eghàlagı̀de sı̀ı ts’atà edexè segogehɂı̨, ası̀ı wegoò ładı̨ dǫne hoghàgetǫ ha dǫne gha segogehɂı̨. Dı̀ı ası̀ı ładı̨ dǫne hoghàgogehto ha gık’e eghàlagı̀de sı̀ı, ı̨da dı̨ xo ts’ǫ̀ wek’e eghàlagı̀de ha. Dı̀ı amı̀ı nı̨htł’è łǫǫ̀tǫ ayehɂı̨ sı̀ı, dı̀ı nı̨htł’èkǫ̀deè enahàtǫ dè akǫ nı̨htł’èkǫ̀ aget’ı̨ ade ha.  

Dı̀ı goxè ładı̨ agot’ı̨ neèhò, Aurora College sı̀ı ası̀ı mǫhdaà ładı̨ ade ha. Ası̀ı ładı̨ k’è ełets’àts’edı zǫ t’à ha, amı̀ı dǫne edàatłǫ dǫne ts’àdı elı̨ ı̨lè sı̀ı, netłǫgǫǫ̀ adle ha ts’ı̨wǫ eyıts’ǫ gokǫ̀ sı̀ı ładı̨ adle ha. Dı̀ı goxè ładı̨ agot’ı̨ neèt’à goxè anet’ı̨ dè ts’ı̨wǫ eyıts’ǫ dı̀ı nı̨htł’èkǫ̀deè sı̀ı t’à gots’àdahdı.